Driver gigapos sa mga tulisan

CEBU, Philippines - Mga molupyo na sa barangay Bangkal, dakbayan sa Lapulapu maoy mihubad sa pisi nga gigapos sa lawas sa usa ka drayber sa taxi kinsa gitulis sa upat ka wala hiilhing armadong mga lalaki didto sa maong barangay sa milabay’ng gabii.

Ang biktima mao si Ryan Entice, 31, nga taga Barangay Tunghaan, lungsod sa Minglanilla, nga nagmaneho sa Remura Taxi nga adunay plaka nga GXE 799.

Gibutyag ni Entice nga ang mga tulisan mipara kaniya didto sa barangay Pusok, dakbayan sa Lapulapu ug nagpahatod ngadto sa Punta Engano.

Pag-abot sa Punta Engano, nanaog ang usa sa upat, samtang ang tulo nagpahatod ngadto sa barangay Bankal sa maong dakbayan apan pag-abot sa mingaw nga dapit kalit lang siyang gitionan og armas de fuego sa mga tulisan dayong deklarar og tulis.

Aron dili siya patyon, gitunol niya ang iyang tanang kinitaan sa maong mga tulisan apan gigapos siya ug gibilin sa maong lugar samtang gidala sa mga tulisan ang iyang sakyanan.

Maayo nalang kay may mga tawong nakakita kaniya, gihubad ang pisi nga gibalikos sa iyang lawas ug miadto dayon siya sa kapolisan.

Unya milihok dayon sila si SPO2 Frederick Eslit ug PO3 Elmer Canillo sa TRS ug ilang nasigpatan ang taxi ni Entice didto sa Sitio Soong sa barangay Mactan hinungdan nga ila kining giduol.

Apan pipila ka metros   gikan sa taxi, gipabuthan sila sa mga tulisan, unya mibawos sila hinungdan nga naigo ang ligid sa taxi ug na-flat kini. (BANAT NEWS)