CEBU, Philippines - Mga krimeng may kalambigitan sa kabtangan nakapaalarma sa Officer-in-Charge sa Cebu Provincial Police Office Sr. Supt. Patrocinio Comendador.
Si Comendador nagkanayon nga iyang namatikdang matag adlaw di momenus upat ka mga krimeng susama niini ang iyang makit-an sa ilang journal nga gikuha gikan sa spot reports nga ipadala sa nagkadaiyang police stations sa lalawigan.
Usa sa nakapaalarma kaniya mao nga gawas sa pagpanghilabot sa kabtangan hasta ang kinabuhi sa biktima nabutang sa peligro tungod kay pasipad-an kundili man patyon sa mga tulisan.
Ang mga lugar nga giingong adunay daghang kasong susama niini mao ang syudad sa Danao, syudad sa Talisay, ug Naga ingon man ang lungsod sa Consolacion ug Minglanilla.
Buot pakigkitaan ni Comendador ang mga hepe sa maong mga police stations aron pangitaan og paaging masumpo kini. Usa sa buot ipatuman ni Comendador ang kanunay’ng pagpahigayon og roving patrols ug joint patrols.
Buot karong makig-alayon si Comendador sa kapolisan sa Pardo Police Station sa Cebu City Police Office tungod sa naghitak usab nga robberies with violence nga insidente sa maong dapit ug kini duol ra usab sa Talisay City.
Samtang gipahibalo ni Comendador sa linaing pakighinabi sa Banat News nga mopahigayon siya og random visits sa mga police stations sa lalawigan. (BANAT NEWS)