Talisay way kalibotan sa US warship

CEBU, Philippines - Si Konsehal Bernard Joseph Odilao, chairman sa committee on environment sa dakbayan sa Talisay mibutyag kagahapon sa mga tigbalita nga wala silay kalibotan bahin sa usa ka US Navy warship nga mipundo sa kadagatan sa maong siyudad.

Si Odilao miingon nga iyang ipasusi ang maong barko apan kagahapon usab sa buntag nahanaw na ang maong barko nga mao ang USS Gridley (DDG-101) missile guided destroyer.

Ang maong barko nga iggugubat kalit lang mitungha sa kadagatan sa barangay Poblacion, niadtong Miyerkules sa hapon ug gituohan sa mga residente sa lugar nga moapil kini sa re-enactment karong adlawa (Sabado) .

Apan si Ensign Joseph Ison, public information officer sa Naval Forces Central (NAVFORCEN) mitataw nga dili moapil sa re-enactment ang maong barko ug sa Talisay kini mipundo tungod sa iyang kadako ug makahasol kini sa ubang mga barko kun adto mopundo Mactan Channel.

Matud pa ni Odilao nga ang lokal nga kagamhanan sa siyudad walay kasayoran bahin sa maong barko tungod kay walay taga barko nga nagpahibawo kanila.

Kun nakahibawo pa sila, mapaninglan unta nila kini og buhis, tungod may balaod na ang Talisay nga magpabayad og buhis kutob sa mga barkong mopundo sa kadagatan niini, matud pa ni Odilao.

Mahinumdoman nga niadtong Marso 2009 gidaro sa M/V Majuro ang Lagundi Reef sa Talisay busa nangagupok ang mga gasang nga maoy puy-anan sa mga isda sa maong lugar.

Sukad niadto mibati og kalagot ang taga Talisay busa estrikto na kini kun may mga barko nga mopundo sa maong lugar. (BANAT NEWS)