Mitulis sa catering 'bigtime' nga tulisan

CEBU, Philippines - Usa sa mitulis sa Maria Lina Catering Services sa barangay Punta Princesa niadtong Marso 20, nailhang miyembro sa bigtime robbery group nga nagbase didto sa Mindanao.

Gikonpirmar kini ni Chief Insp. Anthony Bastes, hepe sa Fuente Police Station sa interview sa CCTN-Channel 47.

Matud ni Bastes nga nakadawat sila og impormasyon nga si Sim Abordo usa sa duha nga mitulis sa Maria Lina Catering Services dugay nang gipanid-an nila human kini moabot dinhi sa Sugbo niadto pang nagsingabot ang Sinulog ug didto kini mopuyo sa lungsod sa Consolacion.

Apan human dakpi si Abordo ug si Roldan Ranollo nagkabuwag-buwag na ang grupo nila.

Si Abordo sa iyang bahin mihimakak sa alegasyon sa kapolisan ug miingon nga wala siya malambigit sa mga dinagko nga tulis.

Matud ni Abordo nga nakadawat og downpayment nga P35 mil gikan sa giingong middle sa gitumbok nga mastermind nga si Manilyn Mier aron ipapatay ang ugangan niini nga si Maria Lina.

Si Abordo nagkanayon nga nakonsensiya sila si Ranollo hinungdan nga ilaha nalang gitulis si Maria Lina.

Si Chief Insp. Aileen Recla, hepe sa Punta Princesa Police Station midason usab sa pamahayag ni Bastes.

Matud ni Recla nga si Abordo miyembro sa Villanueva Robbery Group sa Mindanao nga maoy mitulis sa BDO Cavite sa miaging tuig. (WC) (BANAT NEWS)