Earth Hour karong alas 8:30 sa gabii

CEBU, Philippines - Karung gabii ipatuman ang pagkonserbar sa enerhiya pinaagi sa pagpalong sa suga sulod sa usa ka oras agi og pagpahibalo sa publiko ang kamahinungdanon sa pag-amuma sa atong kinaiyahan.

Lakip sa mosanong ang duha ka dagkong kompanya nga mao ang Premier Developer Cebu Holdings Inc. (CHI) ug Cebu Property Ventures and Development Corporation (CPVDC).

Nasayran nga sa pagpalong unya sa mga suga atol sa Earth Hour nga pagasugdan alas 8:30 sa gabii makakonserbar kini og gibana-banang 3,876.11 kilowatt hours nga gihulagway nga dako na kaayong tabang sa pagkonserbar og enerhiya dinhi lamang sa Metro Cebu.

Gawas pa niini, sulod sa maong oras, ang 3,876.11 KW nga dili magamit nagpasabot nga dili madugangan og gibana-banang 743.83 kilong carbon emission ang kalikupan.

Niadtong 2007, ang labing unang Earth Hour gipasiugdahan sa Sydney, Australia diin 2.2 milyones ka mga Australians ang namalong sa ilang mga suga ug nahimo na kining tulumanon sa tibuok kalibutan agi og pagpakita og pagmahal sa kinaiyahan ug pagpahibalo sa publiko kabahin sa nagkagrabeng problema karon sa kinaiyahan tungod sa Climate Change.

Ang Earth Hour giorganisa sa World Wide Fund for Nature nga mas nailang World Wildlife Fund nga himuon matag katapusang Domingo sa bulan sa Marso matag tuig.

Niadtong 2010, ang Pilipinas maoy migawas nga dunay labing daghang siyudad ug lungsod sa tibuok kalibutan nga misalmot sa Earth Hour nga miabot sa 1,067 ka siyudad ug kalungsoran diin 15 milyones ka mga Filipino ang misalmot.

Niadtong 2009 naka-konserbar og 611 MWh og kuryente ang Pilipinas sa maong oras nga giingong susama ra og mipawong og usa ka dosenang coal-fired power plants sulod sa usa ka oras.

Dinhi sa Sugbu, ang mga sakop sa CHI ug CPVDC nga mao ang Cebu Business Park, Asiatown I.T. Park, Ayala Center Cebu, Cebu Holdings Center, Ayala Life FGU Center, City Sports Club Cebu, Park Towers 1 ug 2 Amara, Garden Ridge Village, e-Office, e-Bloc Tower ug The Walk mosalmot usab niini.

Giagni sa mga organizers ang katawhan sa pagsalmot sa pagpakita og pagmahal sa kalikupan bisan nalang sulod sa maong oras. (BANAT NEWS)