Korte wa kabalo bahin sa balili facility - KEPCO

CEBU, Philippines - Mibisita sa buhatan ni Gov. Gwendolyn Garcia ang abogado sa Korean Electric Power Corporation (KEPCO) sa dakbayan sa Naga aron ipasabot nga kulang og impormasyon ang korte kabahin sa Balili Property nga labayan sa coal ash.

Kini aron pagpahibawo sa kalambuan sa kasong giduso sa mga environmentalist batok sa KEPCO labot sa pagtambak sa coal ash ngadto sa Balili property sa Tinaan, Naga city.

Sumala pa ni Atty. Guillermo Dabbay Jr., ang corporate secretary ug general legal counsel sa KEPCO nga iyang gipahibawo ang buhatan sa gobernadora nga nagkulang og impormasyon ang korte dihang kini mikwestyon sa pagbutang og coal ash sa Balili Property.

Matud pa ni Dabbay nga ang korte wala mahibawo nga ang probinsiya sa Sugbo nakakuha na og Environmental Compliance Certificate (ECC) gikan sa Department of Environment and Natural Resources kon DENR human gipahigayon ang public hearing sa siyudad sa Naga.

Gawas niini, wala usab mahibawo ang korte nga may gitukod ang Kapitolyo nga Coal Ash Disposal Facility nga hapit na mahuman ug gani mahimo na kining kasugdan sa pagtambak og mga coal ash gikan sa KEPCO ug ingon man ang pagtukod og usa ka laboratoryo alang sa maong proyekto.

Gipahibawo usab ni Dabbay nga sa pagkakaron, ang KEPCO may kaugalingong coal ash pond sa sulod sa ilang compound apan kutob na lamang kini sa duha ka bulan.

Iyang gitataw nga kun dili masugdan ang pagtambak sa coal ash ngadto sa pito ka ektaryang coal ash disposal facility sa Kapitolyo human sa duha ka bulan, hayan muhunong sa pag-operate ang KEPCO nga posibleng mosangpot sa pagkakulang sa supply sa kuryente dinhi sa Sugbo.

Tungod niini, si Dabbay miingon nga moduso sila og mosyon sa korte ug ilang ipahibawo ang maong kalambuan ug hangyuon nila nga mopahigayon ang korte og laing ocular inspection.

Kini aron mahibaw-an usab sa korte kun unsa kalayo ang coal ash disposal facility gikan sa nahimutangan sa mga mangrove forest nga giprotektaran sa gobiyerno, ang maong dapit usab plano ni Gov. Gwendolyn Garcia nga tamnan og daghang pagatpat sugod karong tuiga. (/EIM) (BANATNEWS)