KEPCO mihimakak nga hugaw ang tubig

CEBU, Philippines - Gihimakak kagahapon sa Kepco-Salcon Power Corporation (KSPC) nga naglabay sila sa ilang mga hugaw nga tubig diha sa kadagatan sa dakbayan sa Naga diin naapektohan niini ang marine resources diha sa lugar.

Ang nahisgutang power firm mipadala sa ilang pamahayag sa The Freeman ang igsuong pamantalaan sa Banat News nga nagkanayon “We want to clarify that the plant does not discharge wastewater into the sea as we treat and recycle all wastewater for power plant use. The pipe is used for the cooling water system of the power plant.”

“Even if the surface water temperature rises to 30.5 degrees Celsius, this is only 1 degree Celcius increase from the baseline around 29.5 degrees Celsius. This means that the increase in water temperature is within standards as up to 3 degrees Centigrade is allowed”, dugang pa sa KSPC.

Ang maong pagluwat og pamahayag sa KSPC mitumaw human sa gipahigayong ocular survey sa mga sakop sa Knights-Stewards of the Sea Inc. (Seaknights) sa milabay’ng adlaw diin nakita sa grupo nga dunay bubbles o mga buwa nga migawas gikan sa underwater pipe sa maong kompaniya.

Ang Seaknights kinsa gilangkuban sa mga environmental divers ug marine biologists nagtuo nga ang nagbuwa-buwa nga migawas diha sa pipe o tubo mga hugaw nga tubig kini gikan sa planta.

Nasuta sa Seaknights nga ang nagbuwa-buwa nga tubig dunay temperatura nga 30.1 degrees Celsius dihang ilaha kining gisukod niadtong Miyerkules sa buntag.

Si Padre Charlie Orobia kinsa miyembro sa Seaknights nagkanayon nga 25 degrees Celsius lang ang angayang temperature ug kung molapas na niini makadaot na kini sa kinabuhi sa dagat.

Si Jasmin Suma-oy, Community Relations Officer sa KSPC nagkanayon nga si Mayor Valdemar Chiong na ang mipahibawo kanila kabahin sa sitwasyon ug sa karon mipahigayon sila og imbestigasyon sa hitabo ug sa hinungdan niini.

Giangkon ni Suma-oy nga ang mga buwa nga migawas diha sa pipe naggikan kini sa ilang cooling water nga ilang gikuha gikan sa dagat ug ibalik usab ang maong tubig ngadto sa dagat ug anha moagi sa ilang pipe.

Ug ang maong sistema normal turbulence kini sa tubig nga moagi diha sa pipe outlet.

Gitataw usab sa KSPC nga ang cooling water pipe nga ilahang i-release matag adlaw nagsubay ubos sa standards.

Si Suma-oy mihimakak usab sa pasangil sa mga mananagat diha sa lugar nga migamit sila og chlorine alang sa paglimpiyo sa ilang pipes sanglit sodium hypochlorite nga ubos kaayo og concentration ang ilang gigamit. (/EIM) (BANATNEWS)