Laing anti-crime volunteer namusil

CEBU, Philippines - Sa ikaduhang higayon, laing sakop sa Carcar Anti-Crime Task Force (CACTAF) nakapusil kagahapon sa kaadlawon sa sitio Awayan sa barangay Poblacion III syudad sa Carcar.

Ang biktima nailhan nga si Edilberto “Eddie” Fernandez, 41, molupyo sa sitio Kamagayan barangay Perelos sa maong syudad samtang ang gitumbok nga suspetsado mao ang giingong aktibong sakop sa CACTAF nga si Felix “Likboy” Pantilgan, molupyo sa barangay Valencia sa maong syudad.

Sa imbestigasyon sa kapolisan sa syudad sa Carcar nasayran nga ang biktima uban sa usa ka Diosdado Jakosalem naabot sa maong lugar sakay sa usa ka motorsiklo.

Sa diha nga mikanaog kini sa ilang gisakyang motorsiklo giingong giduol sila sa suspetsado ug mitumaw ang komprontasyon tali sa duha.    Tunga-tunga sa ilang tinubagay giingong kalit lang nga gisumbag sa suspetsado ang biktima hinungdan nga dali usab kini nga gi-ulang ni Jakosalem pinaagi sa paghalog sa suspetsado.

Apan imbes mohunong, giingong kalit lang nga mibunot ang suspetsado sa iyang wala pa masayring klase sa armas ug mipusil niini makadaghang higayon.

Ang biktima nakaangkon og samad pinusilan sa likod, liog, tuong bahin sa iyang aping diin dali usab kini nga gidala sa Vicente Sotto Memorial Medical Center (VSMMC).

Nasuta usab nga misulti pa ang biktima sa iyang pangalan ug si kinsa ang mipusil kaniya sa pag-ingon: “Ako si Eddie Fernandez, si Likboy Quijano Pantilgan nga CACTAF pag-umangkon ni Joe Quijano ang gapusil nako.” Ang kapolisan padayun pang nangita sa suspek.

Samtang sa laing bahin, ang suspetsado sa pagpusil patay sa usa ka dispatcher nga hepe sa CACTAF nga si Enrico “Henry” Racoma mihimakak sa maong pasangil gani mibutyag kini nga wala siya makaila sa biktima nga si Herbey Paninsor, 38.

Niadtong Lunes sa hapon, mitumaw ang kagubot sa may Rotunda syudad sa Carcar sa diha nga ang biktima giulo pagpusil sa suspetsado.

Sa pakighinabi sa Banat News ni Racoma, mibutyag kini nga usa siya ka kanhi sakop sa Philippine Army nga na-AWOL (absence without official leave) human siya masakit.

Matud pa ni Racoma nga iyang gikatingala nga gikuha siya sa kapolisan sa diha nga nag-duty siya isip traffic enforcer duol sa usa ka mall sa maong syudad ug nahibulong nalang dihang gipaslak siya sa karsel subay sa kamandoan ni Chief Insp. Ali Baron.

Mao nalang usab niya nasayran nga siya maoy gitumbok nga suspetsado sa pagpatay ni Paninsor butang nga iyang gihimakak sanglit wala gani siya makaila sa biktima.

Dako usab ang pagduda ni Racoma nga posibleng adunay nasuko kaniya sa gihimo nilang clearing sa mga nanindahay og mga chicharon daplin sa karsada dapit sa rotunda.

Sa bahin usab sa hepe sa kapolisan sa syudad sa Carcar, chief Insp. Ali Baron sa diha nga nahinabi sa Banat News, mibutyag nga ang CACTAF ubos sa pagdumala ni Mayor Nice Apura.

Giklaro niya nga gibase ra nila sa pamahayag sa testigo ang pagdakop kang Racoma.

Si Mayor Nice Apura nga nanawag sa The Freeman, mibutyag nga iya gyud nga gidili ang pagdala og mga armas ug uban pang mga hait nga hinagiban ang mga sakop sa CACTAF.

Matud pa ni Apura nga wala gyud siya masayod nga naay armas ang sakop sa CACTAF apan iyang giklaro nga dili gayud siya molaban kun ugaling makasala ang iyang tawo.

Nagdumili usab si Apura sa pagkomento kalabot sa pagpabadlong sa duha niya ka mga sakop tungod kay pasabot pa sa mayor nga ang nabiktima anak usab sa iyang tawo.

Apan nagplano karun ang mayor nga ma re-organize ang maong grupo diin kun ugaling asa sila ibutang ug kinahanglang pakuyogan na niya sila og mga polis ug ipaubos sa training ug seminars. (EIM) (BANATNEWS)