Takas sa Talisay gipangandaman
CEBU, Philippines - Nagbansay-bansay na kagahapon sayo sa buntag ang mga sakop sa Naval Forces Central Command (NAVFORCEN) nga gilangkuban usab sa mga sakop sa 51st Marine Reserve Battalion ug mga sakop sa Philippine Air Force sa ipahigayong re-enactment karong Sabado sa kasaulogan sa ika-66 nga Takas sa Talisay (kanhi Talisay Landing).
Si Ensign Joseph Ison, tigpamaba sa Philippine Navy sa pakighinabi sa Banat News kagahapon nagkanayon nga mokabat sa 120 ka mga personnel sa Philippine Navy ug Air Force ang mopahigayon sa re-enactment.
Matag tuig gipauswag nila ang pag-re-enact sa kasaulogan sa Takas sa Talisay.
Karong tuiga adunay “sigmaphore signaling” diin dunay usa ka tawo nga magbarog sa baybayon nga magbitbit og duha ka mga bandera nga maoy mohatag og signal ngadto sa mga barko.
Atol sa re-enactment ang sakyanan sa dagat sa Philippine Navy nga patrol gunboat 140 Barko ng Republika ng Pilipinas (BRP) Heneral Emilio Aguinaldo, diesel fast craft 353 ug diesel fast craft 339 ug duha ka rigid hull inflatable boat o rubber boat ang gamiton.
Samtang ang Philippine Air Force mogamit sa ilang Huey helicopter aron pagsabwag og mga buwak sa maong lugar.
Si Ison nagkanayon usab nga ang Philippine Army Explosive Ordnance Division maoy moatiman sa mga eksplosibo nga gamiton ug ipabuto atol sa re-enactment aron sama gyud kini sa tinuod nga hitabo sa gyera kaniadto. - BANAT NEWS
- Latest
- Trending
