Sakristan gidunggab sa tulisan

CEBU, Philippines - Naangol ang usa ka sakristan sa simbahan sa Birhen sa Regla sa barangay Poblacion sa dakbayan sa Lapulapu dihang misukol kini sa duha ka wala hiilhing tulisan sa maong lugar sa miaging gabii.

Ang biktima mao si Alex Casul Tumulak, 44 , minyo nga taga barangay Gun-ob sa maong dakbayan samtang ang mitulis mao ang duha ka batan-ong lalaki nga gibanabanang 20 anyos kapin ang panuigon ug kasarangan lang ang pamarog ug gitas-on niini.

Si PO1 John Carlo Jocotan sa homicide section sa kapolisan sa maong dakbayan nga nahinabi sa Banat News miingon nga gikan pa sa iyang trabaho sa simbahan si Tumulak.

Paingon na unta ang biktima sa parkingan sa mga traysikol dihang gisugat kini sa duha ka wala hiilhing mga batan-ong lalaki nga nagpahipi sa waiting shade ug mition og kutsilyo dungan ang pagdeklarar nga tulis.

Ang biktima nga abtikon og lihok dali kaayong mitapi sa kutsilyo nga gition kaniya apan gihansakan ang iyang buko-buko sa kutsilyo sa laing tulisan dayong sirit og panagan pahilayo sa maong lugar.

Nakasinggit og panabang ang biktima ug ang mga nakasaksi maoy midala sa biktima ngadto sa Lapulapu City District hospital apan gibalhin kini   ngadto sa pribadong tambalanan sa dakbayan sa Sugbo. - Uban sa report ni Bong Soriano/WC (BANAT NEWS)