Mitulis sa kolektor sa bakero sikop

CEBU, Philippines - Duha ka mga giingong tulisan kinsa suspetsado sa pagpanulis sa kolektor sa Arbees bakeshop sa barangay Lagtang, dakbayan sa Talisay sa milabay’ng semana nasikop sa grupo sa Criminal Intelligence Branch (CIB) didto sa barangay Buot-taop, ug sa may Citi-link terminal sa barangay Pahina Central pulos sa dakbayan sa Sugbo.

Ang mga nasikop mao si Junry Carbajal ug Jason Bacalso, pulos hingkod ug managsilingan sa barangay Camp 3, dakbayan sa Talisay.

Ang mga giingong biktima sa duha mao si May Charito Pardo ug ang drayber sa nahisgutang bakery nga si Marcial Dungog.

Si Inspector Hugo Rio Ipong sa kapolisan sa Talisay nga nahinabi sa mga tigbalita kagahapon mibutyag nga gitawagan sila ni Chief Inspector Romeo Santander, hepe sa CIB nga ang ilang grupo adunay nasikop nga tulisan kinsa giingong suspetsado sa tulis sa Arbees.

Si Carbajal nasikop sa mga operatiba didto sa barangay Buot-taop, samtang si Bacalso didto usab hidakpi   sa Citi-link.

Matud ni Ipong nga ang grupo ni Santander adunay cellphone nga na-recover gikan kang Carbajal hinungdan nga nakontak nila si Bacalso.

Ang mga polis nga migamit sa nahisgutang cellphone nagpakaaron-ingnon nga si Carbahal ug nagsabot sila nga magkita sa Citi-link hinungdan nga sayon kaayong nasikop si Bacalso.

Ang duha ka mga biktima gidala ni Ipong kagahapon sa buntag ngadto sa buhatan sa CIB ug positibo nilang gitudlo si Carbajal ug Bacalso nga mitulis kanila.

 Kahinumdoman nga ang motorsiklo nga giingong gisakyan sa duha sa ilang pagpanulis napalgan sa kapolisan sa Talisay didto sa likod sa balay ni Bacalso.

Ang maong motorsiklo gihimulbolan na sa mga dapat ug walay plaka nga gitabonan lang og mga lukay aron dili makit-an. (BANAT NEWS)