CEBU, Philippines - Nasakiyo sa usa ka tulisang de motor ang P2 mil cash ug P47 mil nga tseke ug cellphone ug alahas sa usa ka babaye nga gitulis niini didto sa sitio Looc, barangay Maribago, dakbayan sa Lapulapu sa miaging gabii.
Ang biktima mao si Mayflor Malache, 25 anyos, dalaga nga taga Maribago.
Matud pa ni PO3 Manolito Abellanosa sa Theft and Robbery Section sa kapolisan sa maong dakbayan nga ang biktima gikan pa sa ilang balay ug nag-atang kini og jeep pasaheroan dihang kalit lang mihunong sa iyang atubangan ang usa ka motorsiklo nga giluwanan sa nag-inusarang lalaki.
Unya walay tingog-tingog nga milanit kini sa iyang gitangkil nga armas de fuego dayong tion ngadto sa biktima uban sa pagdeklarar nga tulis.
Ang biktima nga mikaging sa kahadlok wala makalihok ug sayon ra kaayong gilabni sa tulisan ang iyang shoulder bag nga gisudlan sa P2 mil cash, tseke nga P47 mil ug usa ka cellphone, dayong pasirit padagan sa ilang sakyanan ug mipahilayo sa maong dapit.
Padayon pang gipangita sa kapolisan ang maong tulisan. (BANAT NEWS)