Umagad sa negosyante gisuwayan og patay maoy gitumbok mastermind

CEBU, Philippines - Ang umagad nga babaye sa tag-iya sa catering services nga giingong giplanuhang ipapatay maoy gipasanginlang utok sa krimen ug gipasakaan kagahapon og kasong robbery with frustrated homicide diha sa piskalya.

Base sa report sa Balitang Bisdak kagahapon, ang mga suspetsado nga sila si Cem Aboredo ug Roland Ranulo miangkon ug mibutyag nga si Manilyn Meier, umagad sa biktimang si Maria Lina Meier maoy mihatag sa envelop nga dunay sulod nga hulagway sa magtiayon nga maoy target nga patyon.

Ang maong pasangil usab nasegundahan sa gwardiya nga misulti nga ang nahisgutang envelop gikan ni Manilyn.

Ang bana ni Manilyn nga si Kurt Meier dili makatuo sa maong pasangil batok sa iyang asawa ug nanawagan kini sa kapolisan nga paladman pa ang imbestigasyon sa maong kaso.

Si Kurt mao ang nakasalbar sa iyang mga ginikanan nga sila Maria Lina ug Ernesto dihang gipangtionan og armas sa duha ka suspek nga una nilang gituohang tulisan, pinaagi sa pagdumbol sa ilang getaway vehicle.

Gibiyaan nalang sa mga suspek ang motor ug misakay og taxi apan naapsan sa mirespondeng mga polis ug nadakpan.

Atol sa imbestigasyon mitug-an ang duha nga dili tulis ang ilang tuyo sanglit tuyo nilang patyon ang maong mga negosyante apan nabulilyaso tungod sa pag-abot sa anak sa duha.

(BANAT NEWS)