Gipatay samtang nagkupot sa tagay

CEBU, Philippines - Gipusil patay ang usa ka lalaki samtang nakig-inom kini sa gawas nga bahin sa gymnasium didto sa barangay Poblacion Oriental lungsod sa Consolacion kagahapon sa ala una pasado sa kaadlawon.

Ang biktima nga patay nang nadangat sa tambalanan mao si Edgar Sabala alyas Bating, 40, molupyo sa nahisgutang lugar.

Duha ka nag-motor nga suspek nga wala mailhi ang pangalan sakay sa kolor puti nga motorsiklo nga way plate number ang gihulagway sa mga nakasaksi nga responsable sa krimen.

Matud ni PO1 Rey Adriaque sa Consolacion police dihang nahinabi sa Banat News subay sa imbestigasiyon ang biktima kauban sa mga barkada niini nag-inom dihang miabot ang duha ka wala mailhing lalaking luwan sa motorsiklo.

Nagdaling nanaog ang angkas dayung bunot sa kalibre .45 nga pistola ug gipusil lima ka higayun ang biktima nga naglingkod ug nagunit pa sa tagay niadtong tungura.

Ang biktima nga nakaangkon og tulo ka samad pinusilan sa iyang dughan, tiyan ug bukton nahagba ug pagkahuman nagdaling misakay og balik sa motorsiklo ang mamumuno ug mipasirit palayo sa lugar.

    Gisuwayan pa unta og hatud lahos sa Vicente Sotto Memorial Medical Center ang biktima apan gideklarar kini nga dead on arrival.

    Samtang ang kapulisan padayon pa sa manhunt operation sa duha ka nagmotor nga suspek. - (BANAT NEWS)