Tag-iya sa Pajero nakadawat og death threats

CEBU, Philippines - Ang manlalaban sa babayeng tag-iya sa Pajero kabahin sa pagdagit ug pagpatay sa 6-anyos nga si Ellah Joy Pique nga si Bella Ruby Santos nga si Ana Luz Cristal mibutyag nga human mipatim-aw sa korte ang iyang kliyente aduna na kini nadawat nga mga death threats.

“I don’t know what exactly the text message because it was in Cebuano, but one thing is for sure it was a life threats for Bella,” pasabot pa ni Cristal.

Matud pa ni Cristal nga ang iyang kliyente na-stress karong panahona   tungod sa nahitabo kanila.

“Hindi pa naka cope up si Bella umiiyak pa din medyo nahimasmasan na, tapos si Ian (Ian Charles Griffith) naman medyo galit sa simula kaso nadadawit ang pangalan niya but ngayon okay na,” matud pa ni Cristal.

Dugang pa ni Cristal nga kasamtangan karun nga anaa sa Manila ang iyang mga kliyente apan wala kini planong mogawas sa nasud, gani mitug-an kini nga dili gyud niya tugutan nga makagawas ang iyang kliyente tungod kay mao usab kini ang makapahinay sa ilang kaso.

Mipasalig si Cristal nga motunga sa hearing ang iyang mga kliyente kun gikinahanglan na sa korte.

Kagahapong adlawa si Cristal mipatim-aw sa korte kini aron sa pagsusi sa iyang gisang-at nga mosyon nga motion to quash search warrant ug gimandoan hinuon sila sa korte nga pasumiteron og komento sa motion to take custody of the seized items nga gisang-at sa Criminal Investigation and Detection Group.

Ang Task Force Ella Joy nagpaabot pa hinuon sa tubag sa korte kalabot sa ilang gisang-at nga motion to take custody of the evidences aron ila nang masang-at ang tukmang kaso ngadto sa piskalya batok sa posibleng suspetsado sa pagdagit patay sa 6-anyos nga si Ellah Joy Pique.

Matud pa ni Officer In charge sa Cebu Provincial Police Office, Sr. Supt. Patrocinio Comendador nga kompleto na ang ilang mga affidavit ug corroborative statements nga usa sa mga lig-ong basehan nga mapasaka ang kaso.

Apan gihulagway ni Comendador nga mas molig-on ang ilang kaso kun tugotan sila sa korte nga sila nalang ang mokostudiya sa mga ebidensya kini aron usab ilang masusi kun makatabang ba kini sa ilang kaso nga isang-at.

Ang amahan ni Ellah Joy nga si Renante Pique giingong kombinsido nga ang tag-iya sa gikustodiya nga sakyanan sa CIDG-7 mao gyud ang suspetsado.

Samtang si Executive Judge Meindrado Paredes, miklaro nga wala silay tugutang abogado nga manginlabot sa kaso nga gisang-at sa CIDG gawas lang sa mga abogado sa respondent ug sa applicant nga mao ang CIDG.

“The Search warrant is for the applicant which is the Criminal Investigation and Detention Group (CIDG) and Bella Ruby Santos and Ian Charles Griffith,” pasabot pa ni Paredes.

Matud pa ni Paredes nga dako usab iyang pagtuo nga ang duha ka partido (CIDG and Santos-Griffith) dili usab mosugot nga adunay abogadong mag-apil apil.

Samtang mibutyag usab si Paredes nga ang mosyon nga gisang-at sa CIDG aduna pay ipahigayon nga hearing.

“They have to orally argue whether or not the seized items will remain in court or CIDG will take the custody,” matud pa ni Paredes.

Apan giklaro ni Paredes nga wala pay kasong napasang-at batok ni Santos ug Griffith. - (BANAT NEWS)