CEBU, Philippines - Dili tulis ang motibo kondili pagpatay gyud ang tuyo sa duha ka unang gidudahang tulisan nga mibiktima sa magtiayong tag-iya og catering services sa barangay Punta Princesa ning dakbayan sumala pa sa kapolisan.
Kini human sa gihimong imbestigasyon sa Punta Princesa Police Station sa dakbayan sa Sugbu nga mitug-an ang mga suspek nga sila si Carl Dumat-ot, 23, ug Arman Cabatan, 27, nga gisugo sila pagpatay sa magtiayon.
Ang duha nga parehong temporaryong nag-abang sa barangay Poblacion Ward 2 sa lungsod sa Minglanilla ug Quiot-Pardo sa dakbayan sa Sugbu pulos lumad nga taga Carmen, Ozamis City.
Gisusi na sa kapolisan ang pangangkon sa duha nga dili sila mga tulisan. Nagduda ang kapolisan nga posibleng mga gun-for hire ang duha tungod sa nakuha nilang mga ebidensya sama sa litrato, kwartang gipadala gikan sa Ozamis City nga giingong bayad sa ilang operasyon pagtumba sa magtiayong Maria Lina Mier ug Ernesto Mier nga tag-iya sa Maria Lina Catering Services.
Ang magtiayon sa unang report giingong gisuwayan sa pagtulis sa duha ug giilogan og bag niadtong Domingo sa buntag diha mismo sa ilang tugkaran sa barangay Punta Princesa ning siyudad.
Apan naabtan sa anak sa duha ang komosyon ug gidumbol sa sakyanan niini ang getaway motorcycle sa mga suspek hangtud nga misibat sila luwan sa taksi apan nadakpan gihapon sa kapolisan sa dalan Tres de Abril.
Si Insp. Eugene Raganas, hepe sa Punta Princesa Police station nga na-interbyu sa Balitang Bisdak sa GMA-7 kagahapon sa hapon nagkanayon nga base sa pangangkon sa duha, kabanay ra ni Maria Lina Mier ang mastermind.
Matud ni Raganas nga kalagot sa pamilya maoy hinungdan nganong ipapatay sa mastermind si Mier.
Ila kining nasayran pinaagi sa text sa cellphone ug pictures nga nakuha nila gikan sa posesyon nila ni Cabatan ug Dumat-ot.
Matud ni Raganas ang mastermind dunay middleman kinsa mao na sab ang misugo kanilang Cabatan ug Dumat-ot aron ipapatay si Mier. Ila na hinuon nailhan ang pangan sa middleman kinsa atua karun sa Ozamis City.
Gani ang kapulisan milarga kagabii paingon didto sa Ozamis aron subayon ang mga gipangbutyag sa mga suspek.
Ang duha, atubangan sa mga tigbalita mitug-ang dili tulis kundili pagpatay gyud sa magtiayon ang ilang tuyo apan naapekihan sila maong gikuha ang bag sa ginang. (EIM) - (BANAT NEWS)