Taxi ug P2mil gisakiyo sa tulisan

CEBU, Philippines - Gisakiyo sa tulo ka tulisan ang taxi ug ang P2 mil kapin nga kinitaan sa drayber niini didto sa dalan Plaridel, sa barangay Alang-Alang, dakbayan sa Mandaue sa miaging kaadlawon.

Ang biktima mao si Efrain Mayordo, 23, nga taga Upper Basak, dakbayan sa Lapulapu ug drayber sa Cool Taxi, samtang ang mga tulisan nga misakiyo sa iyang taxi ug kuwarta, pulos mga batan-on nga armado sa armas de fuego ug kutsilyo.

Si PO1 Raul Eleazar sa Investigation Detection and Management Bureau (IDMB) sa Mandaue City Police Office (MCPO) nga nahinabi sa Banat News miingon nga misakay ang tulo ka tulisan sa gimanehong taxi sa biktima sa barangay Poblacion, dakbayan sa Lapulapu ug nagpahatod kini sa dakbayan sa Mandaue.

Apan sa pag-abot niini sa maong lugar, usa sa mga tulisan midul-it og kutsilyo sa iyang liog uban sa pahibawo nga tulis, dayong kuha sa iyang salapi nga P2,100.

Matud pa ni PO1 Eleazar nga human makuha ang kinitaan sa biktima ang gikatupad niyang tulisan sa front seat mitukmod kaniya sa gawas sa taxi ug gimandoan siya sa pagpadagang walay lingi-lingi dayon gipadagan sa mga tulisan ang iyang taxi.  (BANAT NEWS)