Haya sa namatay'ng nurse sa NZ abot na

CEBU, Philippines - Naabot na kagahapon sa udto gikan sa New Zealand ang patay’ng lawas sa nurse nga si Ivy Jane Cabunilas diin gilahos kini diha Saint Peter Funeral Homes.

Ang pamilya ni Cabunilas nagdumili sa paghatag og pamahayag ngadto sa media kabahin sa pagkaabot sa patay’ng lawas niini.

Kahinumduman nga ang paryente ni Cabunilas nga si Helen Boholst Baysa personal nga mianhi sa buhatan sa The Freeman/Banat News ug nagkanayon nga wala silay gibasol sa nahitabo tungod kay usa kadto ka kalamidad sa kinaiyahan.

Si Cabunilas usa sa 11 ka mga Filipino nurses nga natanggong sa nahugnong edipisyo sa Canterbury Television (CTV) building sa Christchurch City sa New Zealand dihang kini gitay-og og 6.3 magnitude nga linog sa milabay’ng bulan.

Ang laing mga Filipino nurses nga natanggong ug namatay sa nahugnong edipisyo mao sila si Emmabelle Cabahug Anoba, Valquin Descalsota Bensurto, Lalaine Collado Agatep, Erica Nora, Jewel Jose Francisco, Jessie Lloyd Redoble, John Kristoffer Chua, Ezra Mae Medalle, Mary Louise Anne Amantillo ug Rhea Mae Sumalpong.

Ang mga patay’ng lawas sa mga biktima nailhan pinaagi sa DNA test. (BANAT NEWS)