CEBU, Philippines - Mokabat sa P80,000 nga kantidad sa alahas, cash ug mga baligya sa usa ka tindahan sa dalan A.S. Fortuna sa barangay Banilad dakbayan sa Mandaue nga nahanaw human gilungkab sa miaging kaadlawon ug alas-7 pasado na kagahapon sa buntag nadiskubrehan.
Si PO3 Renato Canja sa kapolisan sa Presinto 3 sa Casuntingan Police Station nga nahinabi sa Banat News miila sa gilungkab nga tindahan nga mao ang New Quicky Shop Mart nga gipanag-iya sa magpapatigayon nga si Joaquin Lee nga nagpuyo usab sa maong dakbayan.
Matud pa ni Canja nga sa ilang pakisusi, giguba sa mga kawatan ang atop sa nahisgutang tindahan ug gibuslotan ang kisame aron makasulod ug mao say ilang gigawasan.
Dugang pa niya nga naglakip sa gisakiyo sa mga kawatan mao ang mga grocery, mga alahas nga gipahimutang sa estante, digital camera ug mga galamiton sa mekaniko nga lakip usab sa gibaligya niini.
Si Canja miingon nga ang tag-iya sa maong tindahan nga ilang nahinabi miingon nga mokabat sa P25, 000 kapin nga salapi nga gisulod pa sa ilang kaha nga halin sa miaging hapon ang lakip usab sa gisakiyo sa mga kawatan. (BANAT NEWS)