CEBU, Philippines - Nalandig sa tambalanan ang usa ka negosyante og catering services human kini gisuwayan pagtulis sa duha ka mga lalaki kagahapon sa buntag sa barangay Punta Princesa ning dakbayan.
Ang nalandig sa Chong Hua Hospital mao si Maria Lina Mier, molupyo sa maong lugar nakaangkon og bun-og sa ulo ug sa likod human kini gibukbok sa mga tulisan.
Hinuon nadakpan ang mga suspek nga sila si Carl Labajo Dumat-ot, 23, kasamtangang nagpuyo sa Ward 2 sa lungsod sa Minglanilla ug Arman Cabatan, 27, nagpuyo usab sa Quiot-Pardo apan pulos lumad nga taga Isulan, Sultan Kudarat.
Sa pakighinabi sa Banat News ni PO2 Fortuna Macaranas sa Punta Princesa Police Station mibutyag kini nga ang biktima uban sa iyang bana nga si Erneston miparking sa ilang sakyanan dihang miabot ang mga tulisan ug mition kanila og armas.
Usa sa mga suspek ang miilog sa bag gikan sa babaye apan nagmagahi kini maong gibukbok sa puloan sa kalibre .45 pistola dayon nagdaling misibat luwan sa motorsiklo.
Gidemalas ang duha tungod kay naatlan usab nga maoy pagsulod sa anak sa managtiayon nga si Kurt nga nagmaneho usab og sakyanan ug gidumbol ang motor sa mga tulisan hinungdan nga nangatumba ang duha ug mikaratel.
Nakasakay og taksi ang mga tulisan apan nababagan sila sa Tres de Abril ug narekober ang bag, cellphone ug armas. Si Maria Lina gidala sa usa ka pribadong tambalanan samtang gisusi na sa kapolisan ang background sa duha. (BANAT NEWS)