CEBU, Philippines - Naputos sa samad tinigbasan ang usa ka lalaki ug namatay human kini gitagod-tagod sa usa ka mag-uuma pasado alas-4 sa miaging hapon, sa barangay Tubigon lungsod sa Compostela.
Ang biktima nailhan nga si Jemefel Cabatingan, 22, molupyo sa maong lugar samtang ang gitumbok nga mitigbas kaniya mao si Paquito Demecillo Baco, 60.
Sa pakighinabi sa Banat News ni PO1 Jomarie Jay Montecino sa Compostela Police mibutyag nga sa wala pa mahitabo ang insidente ang biktima giingong hubog nga misulod sa panimalay sa suspetsado ug nanghasi didto.
Tungod sa kakurat sa suspetsado gisukmatan niini ang suspek ug nahitabo ang tinubagay sa duha ug sa kapungot sa naulahi mikuha kini og sundang ug gitigbas makadaghang higayon si Cabatingan sa nagkadaiyang parti sa iyang lawas.
Ang biktima nga nakaangkon og daghang samad tinigbasan sa kalawasan wala na madala sa tambalanan ug namatay diha-diha dayun.
Matud pa ni Montecino nga base sa imbestigasyon aduna nay karaang panagbingkil ang duha.
Kagahapon sa udto pasado alas-12 sa udto mitahan ang suspetsado ngadto sa ilang barangay kapitan nga si Juditha Judilla kinsa mao nay midala kaniya sa kapolisan.
(BANAT NEWS)