Magkapuyo gipamusil namatay

CEBU, Philippines - Patay ang magkapuyong albularyo human gipamusil didto sa ilang pinuy-anan sa barangay Veto sa lungsod sa Minglanilla niadtong Biyernes sa alas 8:00 sa gabii.

Ang biktima nga patay nang nadangat sa tambalanan mao si Clarita Mendoza Sotto, 42, usa ka tambalan ug nadala pa sa tambalanan apan nakabsan gihapon sa kinabuhi ang kapuyo niining si Edwin Pinili Laspoña, 43, mga molupyo sa nahisgutang lugar.

Ang gitumbok nga suspek mao si Jovito Manubag Seloria, 33, molupyo sa maong lugar nga usa ka drayber sa habal habal.

Matud ni PO3 Alfredo Pagaling sa Minglanilla Police Station dihang nahinabi sa Banat News subay sa imbestigasyon nila ni SPO1 Florante Capangpangan posibleng nag-atang nang daan ang mamumuno sa gawas sa panimalay sa mga biktima.

Giingong nagpaabot unta og masakyang habal-habal si Sotto diha sa gawas sa ilang panimalay dihang giduol sa suspek kinsa nagbitbit na og armas. Sumala pa ni Pagaling nga nakabantay ang katabang ni Sotto nga si Melanie Resadas sa suspek ug daling nakasinggit.

Apan nakation na ang suspek sa iyang armas sa baba ni Sotto ug gipusil kini. Ang kapuyo ni Sotto nga si Laspoña daling migawas sa pultahan aron mosusi apan gisugat kini og bala sa suspek ug naigo sa lawas.Human mahagba si Laspoña gibalikan sa suspek si Sotto ug gipusil kini pag-usab sa nagkadaiyang parte sa lawas ug daling miikyas pahilayo.

Ang kapulisan daling milusad og hot pursuit operation sa suspek nga wala pa matumbok niadtong higayuna ug pinaagi sa abag sa mga saksi nasikop usab kini ug dihang gipakita kang Resadas positibo niya kining gitumbok nga maoy mipatay sa iyang mga agalon.

Matud pa ni PO3 Pagaling ang suspek hugtanong mihimakak sa tanang pasangil atol sa gihimo nilang pagsukitsukit.

Si PO1 Evie Espina sa Minglanilla Police Station dihang gihinabi sa Banat News mibutyag nga pasado alas-8 sa buntag kagahapon miadto ang amahan ni Laspoña sa ilang buhatan ug mipahibalong nakabsan kini sa kinabuhi. (/EIM) (BANATNEWS)