CEBU, Philippines - Napanglantawan sa dakbayan sa Lapulapu nga momenus unya ang tourist arrivals gikan sa Japan nunot sa nahitabong linog, tsunami ug ang krisis nukleyar nga nahitabo sa milabay’ng semana.
Si Konsehal Harry Don Radaza nga maoy chairman sa committee on tourism sa konseho sa dakbayan miingon nga ilang gipaabot nga masinati ang epekto sa maong katalagman sa dakbayan sa paglabay sa mosunod nga mga bulan niining tuiga.
Gitataw ni Radaza ang ilang gipasiugdahan nga Davis Cup nga giapilan sa mga atletang Hapones mao unta ang ilang gilauman nga makaagni og dugang mga turista sa dakbayan niining tuiga.
Apan daw dili na kini mahitabo tungod sa maong katalagman tungod kay nagpahiuli pa man ang mga Hapones sa ilang gidangatang kalamidad.
Ang dakbayan sa Lapulapu maoy sagad dagsaon sa mga turistang Hapones ingon man Koreano, Chinese ug uban pang turista tungod sa mga beach resorts niini.
Si Radaza mipalabang og resolusyon sa konseho nga nagpaabot sa ilang pahasubo ngadto sa kagamhanan sa Japan tungod sa maong trahedya. (BANATNEWS)