CEBU, Philippines - Samaran sa liog ang usa ka taxi driver human kini gitulis sa sitio Humayhumay sa barangay Gun-ob dakbayan sa Lapulapu sa milabay’ng hapon.
Ang biktima mao si Cyril Arong, 29, residente sa barangay Labangon dakbayan sa Sugbu kinsa gihimulbulan sa iyang pasaherong tulisan ug nasamdan diha sa liog gikan sa kutsilyong gition kaniya.
Sa asoy ni Arong sa kapolisan , alas 3:30 sa milabay’ng hapon misakay kaniya ang usa ka lalaki ug nagpahatod sa maong barangay apan pag-abot sa hilit nga dapit sa sitio Humayhumay kalit siyang gitiunan niini og kutsilyo sa iyang pasahero dayong deklarar nga tulis.
Gumikan sa kalisang ni Arong gihatag niya ang iyang kinitaan balor 1,200 ka pesos ngadto sa tulisan ug human niini daling mikanaog apan nakadlitan ang liog sa biktima. Sa pagresponde sa kapolisan pakyas kini sa pagsikop sa responsable apan nagduda ang mga sakop sa TRS nga anaa magpuyo ang tulisan sa maong dapit.
Sa laing bahin, milampus ang tulo ka mga tulisan sa pagtulis sa manag-uyab diha sa Tumulak St. sa samang barangay kagahapon sa kaadlawon.
Ang biktima mao si Elluter Momog Bacus, 20 , residente sa sitio Timpolok sa samang barangay kinsa niadtong tungura nag-uban sa iyang uyab dihang gibabagan sa tulo ka batan-on ug mideklarar og tulis.
Nakuha gikan kanila ang iyang cellphone ug pitaka sa biktima lakip na ang bag sa iyang uyab. (BANATNEWS)