FTP sa Mandaue gipahimangnoang magmatngon bisan walay armas

CEBU, Philippines - Gipahimangnoan ang mga Field Training Police (FTP) sa Mandaue City Police Office (MCPO) sa ilang pagtubag sa alarma nga naglambigit sa pagpanulis sa armadong mga tawo nga magmatngon sa paglikay nga dili na masubli ang nahitabo ni PO1 William Mangubat sa dakbayan sa Talisay nga napusilan sa tulisan ug namatay.

 Si Chief Inspector Oscar Monterroyo nga maoy administrative officer sa MCPO nga nahinabi sa Banat News miingon nga sa kasamtangan adunay 45 ka mga FTP nga nadestino sa MCPO. Gitataw ni Monterroyo nga ubos sa kamandoan nga gipatuman sa Camp Crame ang mga FTP sa mga nagkalainlaing kuwerpo sa kapolisan sa lalawigan wala tugoti nga makadala og armas.

Gipasabot niya nga ang mga regular nga mga polis mao lamang ang gitugotan nga magdala og armas.

Nunot niini si Monterroyo miingon nga bisan kun walay gidala nga armas ang FTP sa kadalanan dili usab kini mahimong ihanig nga katarungan nga dili mosanong sa pagtubag sa alarma kun adunay tulis nga mahitabo sa ilang hurisdiksyon sanglit makuwestiyon usab ang ilang katakos. 

Sa nasayran nga si PO1 Mangubat nga usa ka FTP police maoy nakatubag sa reklamo sa usa ka babaye nga biktima kini sa pagpanulis nga maoy nakaaghat sa paggukod niini.

Gipusil si PO1 Mangubat sa tulisan nga iyang gigukod diha sa ilawom sa Mananga Bridge sa dakbayan sa Talisay. (BANATNEWS)