Motor sa tulisan nakit-an

CEBU, Philippines - Ang motorsiklo nga giingong gisakyan sa mga tulisan nga mitulis sa kolektor sa Arbees bake shop ug sa drayber niini na-recover sa mga polis kagahapon sa alas 12:30 sa kaadlawon sa likod sa balay sa usa sa mga suspetsadong tulisan sa barangay Jaclupan, dakbayan sa Talisay.

Si PO2 Leandro Azarcon sa theft and robbery section sa Talisay City Police Station sa pakighinabi niini sa Banat News kagahapon nagkanayon nga ang mga suspetsado nailhan lang sa ngalan nga “Jason” ug “Kulas” nga pulos taga Jaclupan.

Ang pagpanulis nahitabo niadtong Huwebes sa alas 11:30 sa buntag sa Arbees bake shop sa barangay Lagtang, Talisay.

Ang mga biktima mao sila si May Charity Pardo, 20, taga Santo Niño Village, barangay Banilad, dakbayan sa Mandaue, kolektor sa mga outlet sa maong bakery, ug ang kauban niyang drayber nga si Marcial Dungog, 30, taga Jubay, Fatima, lungsod sa Lilo-an.

Nadala sa mga tulisan ang P9,213 nga kwarta nga nakolekta, 1208 nga cellphone, P1,500, pitaka sa drayber nga dunay sulod nga P600 nga kwarta, mga identification card, collection report ug usa ka P.O card nga nagkantidad og P500.

Ang duha ka tulisan giingong kalit lang miduol sa duha ka biktima ug usa kanila miti-on og armas de fuego ug yano ra kaayong mikuha sa mga butang ug kuwarta sa mga biktima.

Matud ni Azarcon nga sa ilang pag-follow-up nga nakit-an nila ang usa ka Rusi nga motorsiklo kolor itom sa likod sa balay ni Jason.

Ang maong motorsiklo nga gihimulbolan na sa mga piyesa, wala nay plaka ug gitabunan og mga lukay.

Gibutyag usab ni Azarcon nga duna silay nadawat nga report nga si Jason bag-ohay lang nakagawas gikan sa Talisay City Jail apan wala nila masusi kung unsay kaso niini.

Ang kapolisan padayon pa sa ilang hot pursuit operation batok sa nahisgutang mga tulisan. (BANAT NEWS)