P8 pletihan petisyon giduso na didto sa Manila

CEBU, Philippines - Pormal nang gisumitir sa mga drayber ang petisyong nangayo og dugang P.50 sentimos nga dugang usbaw sa pletihan sa mga jeepneys aron himuon nang P8 ang minimum nga pletihan dinhi sa Sugbo ug Central Visayas.

Kini human gibutyag ni Ryan Yu ang chairman sa City Transport Cooperative kon CITRASCO dihang nahinabi sa Banat News nga naduso na nila ang urgent motion sa ulohang buhatan sa Land Transportation Franchising and Regulatory Board (LTFRB-Manila) sa nakalabay’ng adlaw.

Gibutyag ni Yu nga gawas sa awhag nila sa LTFRB board nga aprobahan na ang ilang orihinal nga petisyon sa milabay pang tuig nga P8 ang minimum nga pletihan gisumpayan pa nila kini og hangyu didto sa ilang mosyon nga angay unang dugangan og P.50 sentimos ang gipatumang probational increase nga P7.50 nga minimum nga pletihan aron mahimo na kining P8.

Gipasabot ni Yu nga tungod sa pagsaka sa presyo sa lana ning nanglabay’ng mga adlaw gikan pa sa sayong bahin ning tuiga naglisud na gyud ang ilang mga miyembro nga drayber nga mabinlan sa ilang adlaw-adlaw nga kinitaan sa pagpamasahero. (BANAT NEWS)