CEBU, Philippines - Ipahigayon ugmang adlawa, Marso 19 ang 22nd Coastal and 18th Urban Clean-up sa 52 ka mga coastal ug urban barangays sa siyudad sa Sugbu uban sa nagkadaiyang mga volunteers ug mga tinun-an sa nagkadaiyang unibersidad.
Kini gipangulohan sa Coastline Management Board nga ang tumong ipabiling limpiyo ang mga kasapaan sa siyudad aron dili maungot ang mga tubig sa higayon nga dunay dakong pagbaha.
Gidasig usab ni Konsehal Nida Cabrera ang tanang residente sa siyudad nga moduyog sa maong kalihukan pinaagi usab sa pagpanglimpyo sa ilang mga tugkaran ilabi na kadtong namuyo dapit sa sapa.
“Kung mohatag lang gyud og saktong partisipasyon ilabi na kadtong mga opisyales sa barangay, magmalampuson gyud ang maong programa,” nagkanayon ang konsehal.
Nasayran nga miboluntaryo usab ang pipila ka non-government organizations sa maong kalihukan.
Samtang nagpadayon gihapon ang programa sa nagkadaiyang pribadong kompanya sa pagsagop og nagkadaiyang sapa aron sila maoy magdumala niini nga magpabilin kini nga limpiyo.
Gipadayag usab ni Department of Public Services (DPS) chief Engr. Dionisio Gualisa nga dako kaayo og matabang ang nahisgutang programa gumikan kay mahimo kining ehemplo ngadto sa publiko nga manglimpiyo usab sa tagsa-tagsa nila ka mga palibot. - BANAT NEWS