Putol nga paa, kalabera napalgan

CEBU, Philippines - Paa sa tawo nga giputos og karton ang napalgan nga gilabay sa seawall diha sa gate 3 sa barangay Mambaling siyudad sa Sugbu pasado alas-5 kagahapon sa buntag.

Usa ka Cornelio Dinglasa nga tanod sa nahisgutang lugar ug nadestino diha sa gate 3 maoy nagpahibawo nga dunay paa sa usa ka tawo nga nakit-an sa mga basurero diha sa nahisgutang dapit.

Ang South Road Property (SRP) police nga sila si Alejandro ug Samuel Zozobrado mao nay mipahibalo ngadto sa Homicide Section ug sa pasiunang imbestigasyon ni SPO3 Rey Cuyos gibaatan ang usa ka karton nga dunay gisuwat nga “Tocao Edgardo potol toong tiil.”

Human nabasahan sa mga basurero inubanan sa katahap daling gipahibawo si Dinglasa ug giablihan dayon ang karton ug nakugang nalang silang paa sa tawo ang sulod niini. Ang paa gidala ngadto sa St. Francis Funeral Homes samtang gisubay pa sa kapolisan ang tag-iya niini apan adunay pagdudang posibleng gikan kini sa tambalanan.

Si SPOI Roger Nedamo sa Homicide Section mibutyag sa Banat News nga sagad maputlan og tiil sa mga tambalanan mao kadtong may sakit nga diabetes.

Pipila na ka tuig ang nakalabay usa ka paa sa tawo gihapon ang nakit-ang gilabay diha sa taytayan sa dalan B. Rodriguez ug adunay suwat sa pangalan sa pampublikong tambalanan sa putos niini.

Apan nasayran nga polisiya sa pipila ka mga tambalanan nga ang tagtungod sa pasyente maputlan maoy hatagan sa giputol nga bahin sa lawas aron maoy mohipos o mopalubong niini.

Sa laing bahin, naukay ang mga residente sa sitio Camp 6, barangay Manipis dakbayan sa Talisay kagahapon sa buntag tungod sa ulo sa kalabera nga napalgan sa usa ka mangangahoy.

Si PO1 Rosauro Pasumala sa pakighinabi niini sa Banat News kagahapon nagkanayon nga si Kapitan Renato Manayon mibutyag nga napalgan diha daplin sa sapa ang maong kalabera.

Matud ni Pasumala nga si Ostello Baynos, 57, nga residente sa maong dapit ug nangahoy duol sa sapa maoy nakakita sa nahisgutang kalabera migimaw diha sa yuta.

Si Pasumala nagkanayon nga posibleng kaniadto pa gipatay ug diha gilubong sa maong dapit ang maong kalabera tungod kay ang ulo sa kalabera gilumotan na kini ug gani nawagtang na ang apapangig.

Gisubay sa mga polis ang lugar diin mapalgi ang ulo sa kalabera ug gipasuwayan sa pagkubkob apan wala nay napalgang uban pang parte sa bukog sa tawo. - Brenda Batuto ug Rey Pasaporte/EIM (BANAT NEWS)