Inayawan landfill pasirad-an na gyud

CEBU, Philippines - Sirhan na gyud sulod niining bulana ang Inayawan landfill ug kasamtangan karon nga gisusi sa siyudad sa Sugbo ang pipila ka dapit sa Naga ug Consolacion aron maoy himuong labayanan sa basurahan. Kini maoy gipahibalo ni Mayor Michael Rama gumikan kay napuno na pag-ayo karon ang Inayawan Landfill ug nalapas na usab ang saktong gidugayon niini.

Una na nga gipadayag ni Konsehal Nida Cabrera nga kinahanglan ang kooperasyon sa katawhan aron dili magpasad ang mga basura sa siyudad ug usa na niini ang pagtuman sa waste segregation.

Ang Inayawan landfill nagsugod niadtong 1998 ug pito lang ka tuig ang kapasidad niini sa operasyon. Mopaubos pa og seryoso nga negosasyon ang kagamhanan sa siyudad sa Sugbo ngadto sa mga opisyales sa Consolacion aron matuki ang maong plano.

Nasayran nga moabot ngadto sa 500 tonelada nga basura ang ilabay diha sa Inayawan landfill matag adlaw.

Samtang gipahibalo ni Konsehal Eduardo Rama nga ila usab nga ipaalerto ang mga barangay tanod sa pagbadlong sa mga tawo nga magpataka og labay sa basura bisan dili pa oras sa pag-abot sa garbage truck.

Aminado si Rama nga nakatabang pag-ayo karon sa maong kampanya ang mga sakop sa barangay environment officers (BEO), City Environmental Sanitation Enforcement Team (Ceset) ug mapalapdan pa gyud kini pag-ayo sa pag-abot sa dugang puwersa sa                   mga tanod.  - BANAT NEWS