Comendador OIC na sa CPPO

CEBU, Philippines - Pormal nang milingkod kagahapon sa hapon ang bag-ong natudlong officer-in charge (OIC) sa Cebu Provincial Police Office (CPPO) nga si Sr. Supt. Patrocinio Comendador nga kanhi hepe sa Regional Investigation and Detective Management Division (RIDMD) kinsa mao usab ang gitudlong tigpamaba sa Task Force Ellah Joy Pique.

Si Comendador maoy mihulip pagka OIC sa CPPO ni Sr. Supt. Louie Oppus kinsa maoy Deputy Regional Director for Operation sa Police Regional Office-7.

Si Comendador sa pakighinabi sa mga tigbalita kagahapon nagkanayon nga una niyang hatagan og prayoridad nga mabalik ang kuryente sa CPPO aron dili maapektahan ang ilang trabaho diha sa kampo.

Siya mibutyag nga nakig-istorya siya kang Chief Supt. Ager Ontog ug sa comptroller diha sa ilang rehiyonal nga buhatan aron mabayran ang P386,342.97 nga kuryente sa Visayan Electric Company (VECO).

Giklaro ni Comendador nga ang mobayad gyud sa kuryente sa CPPO mao ang PRO-7 apan tungod kay dunay verbal nga kasabotan tali sa provincial government ug sa mga nangaging provincial directors nga maoy mobayad sa kuryente hinungdan nga wala na mobayad ang PRO-7.

Samtang si Supt. Teofilo Seclot, Deputy Provincial Director for Operation (DPDO) miingon nga napiang gyud ang ilang operasyon tungod sa kawalay kuryente.

Si Gov. Gwendolyn Garcia miklarong nahatag na sa Kapitolyo ang ilang suporta pinaagi sa pagpatukod sa bag-ong edipisyo sa CPPO ug uban pa.   

Lakip sa naapektahan mao ang ilang tubig tungod kay motor man ang gisaligan sa ilang pump. – EIMM (BANAT NEWS)