CEBU, Philippines - Naalarma ang mga molupyo sa Santa Lucia sa barangay Poblacion Oriental, sa lungsod sa Consolacion tungod sa mga tulisan nga magmaskara nga padayong mihasi sa maong lugar.
Ang maong mga tulisan matud pa sa mga molupyo armado sa armas de fuego ug kutsilyo ug daghan na ang nabiktima sulod sa maong subdivision.
Si PO3 Alin Garciano nga nahinabi sa Banat News miingon nga niadtong miaging Domingo sa gabii tulo ang biktima sa maong mga tulisan nga nagmaskara.
Giila ni PO3 Garciano ang mga biktima nga si Roldan Amorganda, 25 , nga nagpuyo likod sa public market sa barangay Cansaga, Jesson Sybico, 22, ug Ropse Semar 20, taga barangay Nangka, pulos sakop sa maong lungsod.
Matud pa ni PO3 Garciano nga pulos naglakaw sa karsada ang mga biktima sa managlahing takna, dihang gisugat sila sa nagmaskara nga mga tulisan ug pulos gihimulbolan sa ilang mga alahas ug salapi.
Hinuon matud pa ni PO3 Garciano nga nagtuo sila nga taga diha ra ang maong mga tulisan ug mao kini ilang gibantayan karon. - (BANAT NEWS)