CEBU, Philippines - Nasamdan ang usa ka 19-anyos nga lalaki human kini gipusil samtang nagsakay og motorsiklo sa laing mga wala mailhing mga lalaking nagsakay usab og motorsiklo diha sa dalan C. Padilla sa barangay Duljo-Fatima kagahapon sa kaadlawon.
Ang biktima nailhan nga si Ryan Debuayan, 19, taga barangay Punta Princesa diin nakaangkon kini og samad pinusilan sa likod nga bahin sa iyang lawas.
Sa inisyal nga imbestigasyon sa kapolisan nasayran nga ang biktima padulong sa taytayan sa nahisgutang lugar apan sa iyang pag U-turn kalit lang nga adunay duha ka tawo nga nagsakay og motorsiklo ang mibabag sa iyang agi-anan.
Tungod niini, dali siyang mipabulhot sa iyang gimaneho nga motorsiklo apan kalit siyang gipa-ulanan og bala hinungdan sa pagkaigo sa iyang likod ug milapos ang bala sa iyang tiyan.
Tungod niini nalahos siya og kabangga sa tumoy sa maong taytayan ug nalimbuwad samtang ang mga gikatahapan daling misirit palayo sa maong dapit, ang mga sakop na sa mirespondeng Mobile Patrol Group maoy midala kang Debuayan sa Cebu City Medical Center.
Nakuha gikan sa crime scene mao ang tulo ka kabhang sa kalibre .45 uban sa usa ka slug samtang wala pa maestablisar sa kapolisan ang motibo sa krimen. (BANAT NEWS)