CEBU, Philippines - Namatay ang usa ka lalaki dihang nadasmagan kini sa dakong sakyanan samtang nagmaneho sa iyang motorsiklo didto sa highway sa barangay Taytay, syudad sa Bogo sa miaging hapon.
Ang biktima mao si Becky Tiquello, 35, nga taga barangay Anapog, lungsod sa San Remegio.
Sa pakighinabi sa Banat News ni traffic officer SPO2 Rogel Layson sa Bogo Police nasayran nga ang biktima nagmaneho sa iyang motorsiklo nga paatubang sa maong syudad gikan sa ilang lungsod.
Sa pag-abot niini sa kurbadahong bahin sa Taytay giingong gikasugat niini ang Mitsubishi Adventure nga kolor maroon nga nagtangag sa plakang YJC-619 nga mi-overtake sa gisundang sakyanan.
Gumikan kay nakapabulhot na og padagan ang drayber niini nga si Joselito Solon, nga taga barangay Bagay, lungsod sa Daan Bantayan, naglisod na kini sa pagkontrolar dihang nagpadulong usab kaniya ang kasugat niyang motorsiklo sa biktima.
Gumikan sa kagaan, sayon kaayong nalagpot ang motorsiklo samtang milupad ang biktima nga nagmaneho niini sa gilay-ong 7 metros ug sa pagtugpa niya sa sementadong karsada, nag-una pagkaugbok ang iyang ulo.
Dali gihatod ngadto sa Verrallo District Hospital ang biktima apan gibalhin sa Cebu Doctors Hospital human sa hilabihang kadaot sa lawas nga naangkon niini.
Matud pa ni Layson nga kagahapon pasado alas 2:00 sa kaadlawon ang asawa sa biktima mitawag sa ilang buhatan ug nagpahibalo nga nakabsan sa kinabuhi ang biktima.
Kasamtangang natanggong sa karsel sa kapolisan sa syudad sa Bogo ang suspetsadong drayber ug nagpaabot sa kiha nga isang-at batok kaniya. (WC)(BANAT NEWS)