CEBU, Philippines - Duha ka tawo ang nadakpan uban sa gihuptan nilang pinaketeng pinulbos nga butang nga gituohang shabu ug mga kahimanan sa paggamit niini didto sa barangay Pacnaan, dakbayan sa Mandaue sa miaging gabii.
Ang mga suspetsado mao sila si Rogelio Alilin, 46 anyos, minyo nga nagpuyo sa sitio Tingco, ug Orly Ulan-Ulan, hingkod nga taga sitio Mongos, tanan sa barangay Pacnaan.
Si Alilin nasakmitan og walo ka paketeng gituohang shabu, samtang si Ulan-Ulan, nasakmitan og usa ka pakete uban sa P200 nga buy-bust nga kuwarta.
Si Inspector William Abot, hepe sa kapolisan sa maong dakbayan mibutyag sa Banat News nga sa sayo pa gipanid-an nila ang maong mga suspetsado ug dihang natino na nila ang tanan, mihimo dayon sila og buy-bust operation.
Si Inspector Abot miingon nga ipadala nila ngadto sa Crime Laboratory sa PNP ang ilang nasakmit nga gituohang shabn ug kun positibo ang resulta mao kini ang ilang himoong ebidensiya sa pagpasaka og kaso batok sa mga suspetsado gumikan sa paglapas nila sa Republic 9165 kon Comprehensive Dangerous Drugs Act of 2002. (BANAT NEWS)