Mogradwar uniporme ang isul-ob
CEBU, Philippines - Ang mga mogradwar nga tinun-an karong tuiga sa dakbayan sa Talisay posibleng magsul-ob sa ilang uniporme inig paso sa entablado kun walay ikaabang og toga ang ilang ginikanan, matud ni Woodrow Denuyo, Division Superintendent sa Department of Education sa siyudad.
Matud ni Denuyo nga sa iyang nahibaw-an nga ang abang sa tuga dili makaabot og P50 apan sa graduation pasakaan kuno ang abangan niini. Miingon siya nga kung mosubra na sa P50 ang abang, maayo pang magsul-ob na lang og uniporme ang mga bata inigpaso nila sa entablado.
Gibase ni Denuyo ang iyang hunahuna sa gipagawas nga memorandum sa DepEd nga nagdili sa compulsory nga pagpangayo og amot sa mga kabataan alang sa ilang gradwasyon.
Gibutyag ni Denuyo nga ang tanang galastohan sa graduation anha kuhaon sa pundo sa Maintenance and other Operating Expenses Allowance (MOEA).
Matud niya nga gikinahanglan ang yano nga graduation ug likayan ang pagpanapit og mga dagkong opisyal isip bisita kay mao kini makapadako sa gasto.
Si Denuyo midugang nga mahimong mangimbitar sila og politiko kay ang gradwasyon usa sa ilang social function apan dili bahin sa ilang pamolitika.
Hinuon kun mamulong ang politiko panahon sa gradwasyon dili sila kapugong niini kay layo pa man usab ang eleksyon, matud pa ni Dinuyo. (WC)(BANAT NEWS)
- Latest
- Trending
