Barko nasangad sa dagat sa Pasil

CEBU, Philippines - Nasangad sa kadagatan sa sitio Lawis, barangay Pasil, dakbayan sa Sugbo ang Lite Ferry 9 nga barko kagahapon sa alas 3:00 pasado sa kaadlawon, maayo nalang kay walay kinabuhing naangin.

Ang tigpamaba sa Philippine Coast Guard Anelito Gabisan nga nahinabi sa Banat News kagahapon nagkanayon nga ang maong barko usa ka passenger-cargo vessel nga nagbiyahe paingon nganhi sa Sugbo gikan sa lungsod sa Tubigon, Bohol dihang misipyat ang kapitan sa pagbana-bana sa giladmon sa dagat nga misangpot sa pagkasangad niini sa mabaw nga bahin sa kadagatan sa Lawis.

Matud usab ni Gabisan nga niadtong higayona ang maong barko adunay 37 ka mga pasahero ug mga alas 5:45 na-rescue sila gikan sa barko ug gidala paingon sa pantalan.

Sa laing bahin, usa ka barko sa Trans Asia Shipping Lines nga mao ang M/V Asia Malaysia nga nagbiyahe gikan sa probinsiya sa Ilo-ilo paingon gihapon nganhi sa Cebu giingong dugay naabot sa pantalan sa Sugbo tungod kay napawong ang usa ka makina niini sa lawod.

Apan ang telephone operator sa nahisgutang kompaniya nga si Estella Delostrico mihimakak sa maong report ug nagkanayon nga miabot ang barko sa alas 8:40 sa buntag kagahapon , nga maoy naandang oras nga idunggo sa M/V Asia Malaysia sa pantalan sa Sugbo.

Sa laing bahin usab, si Ellah Comahig sa Philippine Atmospheric Geophysical and Astronomical Services (PAGASA) sa pakighinabi sa Banat News kagahapon nagkanayon nga tungod sa aftershock sa Tsunami   sa Japan, ang kadagatan dinhi sa nasud midagko usab ang bawod nga mikabat og 1.5 metros ang gitas-on nga naghatag og peligro sa mga barko nga ubos sa 10 tons ang kapasidad.

Ang PAGASA miawhag sa mga residente nga duol sa kasapaan, kadagatan ug ang naa sa bukirang bahin nga magmabinantayon aron malikayan ang disgrasya. (BANAT NEWS)