Prisyo sa mga baligya gimonitor

CEBU, Philippines - Higpit nga gimonitor karon sa Department of Trade and Industry (DTI) ang prisyo sa mga nag-unang palaliton sa kabalaka nga pahimuslan sa pipila ka mga magpapatigayon ang pagpasaka sa prisyo sa ilang mga baligya aron iduyog ang kalisod karon sa kalibotan.

Si Zaide Bation nga maoy supervisor sa provinvial price monitoring body sa DTI miingon nga dili lang ang prisyo sa mga nag-unang palaliton sa kamerkadohan ang ilang gimonitor, kundi bisan ang mga baligya sa mga dagkong department store ug mga tindahan sa public market sa dakbayan sa Sugbo, dakbayan sa Mandaue ug dakbayan sa Lapulapu.

Matud pa niya nga ilang gilakip sa pag-monitor ang mga prisyo sa nag-unang palaliton sa kamerkadohan sa dakbayan sa Naga, dakbayan sa Carcar, ug paingon na ngadto sa dakbayan sa Bogo ug dakbayan sa Danao.

Dugang pa niya nga naglakip sa ilang gimonitor mao ang bahin sa asukar, mga linatang pagkaon nga naglakip sa gatas, sardinas ug uban pa.

Si Bation miingon nga adunay tukmang silot alang niadtong mapahimuslanon nga magpapatigayon nga mopahimulos sa kahigayonan ilabi na sa nasinating kalisod karon dinhi sa nasud.

Sa nasayran nga ang kaguliyang didto sa Libya ug uban pang dapit sa Saudi Arabia miulbo na nga maoy hinungdan usab sa nagsunodsunod nga pagsaka sa prisyo sa produktong petrolyo.

Gisundan ang maong kaguliyang sa nasinati nga linog sa Japan nga miresulta sa pagkagusbat sa mga kabtangan ug mga kinabuhing nakalas nga nakapatumaw sa kabalaka nga mosaka usab ang prisyo sa mga nag-unang palaliton dinhi sa nasud. (BANAT NEWS)