Honeymoon sa lider sa Korea dinhi sa Sugbo

CEBU, Philippines - Dinhi sa Sugbo nag-honeymoon ang kanhi pangulo sa South Korea nga si Kim Young-sam uban sa iyang asawa nga si Son Myeong-sun atol sa ika-60 nga kasumaran sa ilang kaminyoon.

Si Gobernador Gwendolyn Garcia midalit og panihapon sa magtiayon sa Kapitolyo niadtong Biyernes sa gabii, diin didto ibutyag ni Kim nga gipili nila ang Sugbo sa ilang honeymoon tungod sa kaanindot niining lugara.

Miabot sa Sugbo ang magtiayon kauban sa ilang delegasyon niadtong Miyerkules sa tungang gabii aron pagtambong sa kalihukan sa Cebu Kopino Children Foundation, Inc, pundok kini sa kabataan nga anak sa magtiayon nga Koryano ug Pilipino.

Gipasalig ni Kim nga iyang itaho sa pagbalik nila sa South Korea ang kaanindot sa Sugbo alang sa honeymoon.

Samtang dakung garbo alang sa Sugbo ang pagpili sa kanhi presidente sa South Korea sa Sugbo nga lugar sa ilang honeymoon. Matud pa ni Garcia nga haum kaayo ang pagpili sa Sugbo nga maoy gihugopan karon sa mga Koryanong turista.

Si Bokal Agnes Magpale, kinsa maoy tsirman sa committee on tourism and international relation sa Hunta Probinsiyal mipadayag usab nga bulahan kaayo ang Sugbo nga napili sa magtiayon sa tanang probinsiya sa nasud.

Si Magpale, kinsa maoy tsirman sa committee on children, midayeg sa dakong tabang sa South Korea sa mga kabataan nga nia na namuyo sa Sugbo. (BANAT NEWS)