Paralitiko napaig sa sunog

CEBU, Philippines - Napaig ang usa ka 72-anyos nga lalaking paralitiko dihang nasunog ang duha ka panimalay sa sitio Camino sa barangay Gabi sa lungsod sa Cordova kagahapon sa kaadlawon.

Ang nakalas mao si Loreto Pacaldo, 72, ugangan sa usa sa mga tag-iya sa nasunog nga balay kinsa dili na makalakaw ug diha sa iyang lawak atol sa pagkahitabo.

Ang kabomberuhan miingon nga ang sunog nagsugod sa panimalay ni Julieta Garcia ug dali kini nga mikatap ngadto sa panimalay ni Felix Casilac.

Matud pa ni Cordova Fire Marshal Sr. Insp. Ethel Margaha base sa ilang pasiunang imbestigasyon nga sa ikaduhang andana sa panimalay ni Garcia nagsugod ang kalayo human madungog ang usa ka masipang buto.

Matud pa ni Garcia gumikan sa kakalit sa maong panghitabo iyang giluwas ang iyang mga gagmay’ng anak nga nagpangidaron og 12, 10 ug 4 anyos. Ang usa sa mga bata nasamdan kini human nga mikuyog ni Garcia sa pagluwas sa iyang 4-anyos nga manghod.

Hangtod ning pagbalita padayon pa ang imbestigasyon sa kabomberohan sa Cordova sa sinugdanan sa maong kalayo sa lawak sa mga Garcia.

Hinuon luwas ang tanang mga sakop sa panimalay sa mga Casilac base sa pakisusi sa mga bombero sa maong dapit.

Nadawat sa kabomberohan ang alarma mga alas 12:56 kagahapon sa kaadlawon ug gipaubos sa 2nd alarm ug nakontrolar sulod sa 15 minutos.

Matud pa ni Sr. Insp. Margaha mao kini ang labing unang dako nga insidente sa sunog sa ilang pagsaulog sa Fire Prevention Month kung itandi sa mga milabay’ng tuig. (EIM) (BANAT NEWS)