CEBU, Philippines - Niulbo ang kasuko ni Gob. Gwendolyn Garcia human masayring wala ipatuman ang “no ticket, no boarding policy” sa Cebu South Bus Terminal.
Ang mga bus operators mismo ang misulti niini atol sa gipatawag nga tigom ni Garcia sa Kapitolyo kagahapon atol unta sa diyalogo kabahin sa tinguha sa mga operators nga iimplementar ang usbaw sa pletihan.
Giingong gibutyag sa mga operators kang Garcia nga wala ipatuman ang kasabutan nga kolektahan daan sa ilang plete ang mga pasahero dungan ang pagbayad sa terminal fee nga P5.
Dili pasakyon sa bus ang pasahero kung dili makapakita sa duha ka tiket sa plete ug terminal fee ngadto sa gwardiya sa boarding gate.
Ang pangulo sa Cebu Provincial Bus Operators Association, Richard Corominas, miingon nga ang gikolekta sa ilang mga sakop mao lang ang tag P5 nga terminal fee.
Gikatingala usab ni Provincial Administrator Eduardo Habin nga terminal fee ticket lang ang makit-an sa iyang mga sakop atol sa inspeksiyon.
Usa sa mga hinungdan nga dili kolektahan sa mga konduktor ang mga pasahero mao nga dunay uban nga mobalhin sa laing bus human sila makahatagi og tiket.
Apan wala kini paminawa ni Garcia sanglit matud pa niya, walay pasahero nga makaako pagbalhin sa laing bus human siya makabayad sa plete sa unang bus.
Daling gimandoan ni Garcia si Habin sa pagpatuman dayun sa nahaunang kasabutan kagahapong adlawa. (BANAT NEWS)