CEBU, Philippines - Nabungkag ang pumpboat ug kamot nalang ang nakita sa parte sa lawas sa usa ka mananagat human gituohang may mibuto sa pumpboat niini diha sa kadagatan sa sitio Malingin sa barangay Punta Engaño dakbayan sa Lapulapu kagahapon.
Si Tereso Daño, residente sa maong dapit maoy giingong tag-iya sa pumpboat nga nabungkag ug mikompirmar nga ang iyang maguwang nga si Eugenio Daño, 47,nagpuyo sa Pandanon lalawigan sa Bohol maoy nagdala sa maong bangka.
Sa imbestigasyon sa kapolisan pinaagi ni Insp. Juan Capacio ang hepe sa Homicide Section sa Lapulapu nasayran nga si Eugenio ug mga kaubanan sa buntag pa niadtong petsa 10 ning bulana nanagat ug alas-8 sa milabay’ng gabii mipauli ug nag-angkorahe sa maong dapit.
Si Daño miboluntaryo nga magpabilin sa pumpboat aron maoy mobantay sa sakayan, apan mga alas 11:00 sa gabii sa susamang petsa usa ka masipang buto ang ilang nabati sa dapit nga nahimutangan ni Eugenio ug sa pagsusi pa nila nabungkag na ang maong pumpboat.
Hugot nga gipanghimakak ni Tereso Daño ug mga kauban sa biktima nga nalambigit sila sa ilegal nga panagat ug gihimakak nilang aduna silay dinamita nga mao karoy posibleng hinungdan sa pag-ulbo sa maong sakayan.
Sa pasiunang pakisusi sa kapolisan nasuta nga posibleng ang dala niini nga “improvise compressor” ang mibuto gumikan sa kapuno na sa hangin.
Kagahapon sa mga alas 8:00 sa buntag si Tereso mismo ang misusi ilawom sa dagat aron sa pagpangita sa patay’ng lawas sa iyang igsuon, apan bugtong ang duha ka mga kamot lamang sa tawo nga gituohang iya ni Eugenio ug ang compressor ang iyang nakita ilawom sa dagat.
Gawas sa mga kamot nakit-an usab ang pipila ka mga unod sa baybayon nga gituohang iya sa tawo. (EIM)