CEBU, Philippines - Makapadayon na ang kagamhanan sa siyudad sa Carcar sa pagpalapad sa ilang kadalanan human ang Department of Interior on Local Government (DILG) mitumbok nga legal ang ilang gihimong pag-demolish sa mga estraktura sa daplin sa kadalanan sa maong dakbayan.
Sumala pa ni DILG-7 Assistant Regional Director Elias Fernandez nga wa lang kaayo kahatagi sa hustong kasayoran si DILG Undersecretary Austere Panadero sa iyang pagluwat og mando sa pagpahunong sa ilang proyektong inprastraktura sanglit ang gipangguba nga mga estraktura dili man mga pinuy-anan.
Atol sa tigum uban ni Gobernador Gwen Garcia ug Carcar Mayor Necepuro Apura, si Fernandez miingon nga iyang gipahibawo si DILG Secretary Jessie Robredo aron makurihian ang maong kasaypanan.
Samtang si Gobernador Garcia nalipay sa gihimo ni Mayor Apura aron mapalapdan ug malimpyo sa kadalanan gikan sa mga illegal nga estraktura.
Matud pa sa gobernadora nga mahimong mosunod ra sa gihimo ni Mayor Apura ang ubang mga mayor sa kalungsoran ug component city aron mapaanindot pa niini ang ilang mga kadalanan ug may kahigayonan nga makadaog sa programa ang Expanded-Green and Wholesome Environment Search for the Best Highway and Major Thoroughfare. - (BANAT NEWS)