Gipusil sud presinto tipi

CEBU, Philippines - Napusilan patay sulod sa police station ang miduaw nga igsuon sa usa ka wanted nga natanggong diha sa karsel sa Danao City Police Office sa dakbayan sa Danao niadtong Miyerkules sa alas 5:55 sa hapon.

Ang biktima nga namatay gyud pag-abot sa tambalanan mao si Domiciano Estocado, molupyo sa sitio Katilingban sa barangay Bagaas, Hinigaran, Bacolod City.

Samtang ang gitumbok nga nakapusil kaniya mao si SPO4 Jose Salingua nga nadestino ra usab sa nahisgutang police station.

Matud ni SPO2 Luis Perales, desk officer sa Danao City Police dihang nahinabi sa Banat News si Estocado giingong miduaw sa iyang igsuong gipriso nga si Jenny Estocado.

Si Jenny boluntaryong mitahan sa kaugalingon sa milabay’ng adlaw ug mi-angkon nga maoy nakadunggab patay sa iyang silingan didto sa Bacolod City tungod sa utang nga wala mabayri.

Matud ni Perales nga tungod kay standard operating procedure ang desk officer nga maoy kasamtangang jailguard niadtong higayuna nga si SPO2 Arestio Espina mikapkap kang Domiciano.

Apan samtang gihimo kini ni Espina gikatahong kalit nga giilog ni Domiciano ang armas nga kalibre .45 nga giluklok sa hawak sa maong polis hinungdan nga misangpot kini sa ilang paglinayogay.

Si Salingua nga diha sa radio room niadtong higayuna nakabantay sa maong komosyon ug pagsusi naligid na si Espina ug si Domiciano hinungdan nga miresponde si Salingua.

Apan dihang duol na si Salingua gikatahong miibot og kutsilyo diha sa iyang kilid si Domiciano ug gidunggab si Salingua apan nakabantay ang naulahi ug nasagang apan naigo ang iyang ilong.

Tungod niini napusilan ni Salingua sa iyang .45 ang tuong paa ni Domiciano apan matud pa nga wala kini mohunong ug subling miatake kang Salingua hinungdan nga gi-usban kini og pusil ug naigo sa tuong bahin sa lawas ug natumba.

Gidali unta dayun gihatud sa mga polis ang biktima didto sa Danao City District Hospital apan dangtan og pipila ka gutlo namatay gyud kini.

Ang hepe sa Danao City Police nga si Chief Insp. Eddie Ricamara mipaubos og camp restriction kang Salingua alang sa imbestigasyon nga gihimo sa kapulisan sa maong panghitabo. (EIM) (BANAT NEWS)