CEBU, Philippines - Nadakpan ug gikuninitan sa mga drayber ang duha ka mga batan-ong gidudahang maoy mga responsable sa mga nagsunod nga mga tulis sa taksi sa Metro Cebu human gitabangan og gukod sa gibana-banang 50 ka mga taxi units nga nakabantay sa ilang pagtulis sa laing drayber sa milabay’ng gabii.
Ang pagpanulis nahitabo diha sa dalan Sepulveda sa dakbayan sa Sugbo diin usa ka Mary Joy Taxi nga gimaneho ni Efren Lamberto nga taga barangay Apas sa dakbayan sa Sugbu ang nabiktima.
Si Inspector Ramil Morpos, deputy chief sa Investigation Detection Bureau (IDMB sa Mandaue City Police Office (MCPO) miila sa duha ka gipasanginlang tulisan nga nadakpan mao si Arman Cantila, 23, ug Rustie Reyes, 19, pulos taga purok 4 sa sitio Sabang sa barangay Guadalupe, dakbayan sa Sugbo.
Matud pa ni Morpos misakay ang duha diha sa Ayala Business Park ug nagpahatud sa dalan Sepulveda apan pag-abot sa maong lugar gitionan og kutsilyo si Lamberto ug mideklarar og tulis ug nakuha ang wala pa matinong kantidad sa kinitaan sa biktima.
Ang mga tulisan mipakanaog kang Lamberto ug gimaneho ang taksi hinungdan nga nagpatabang sa mga kaubang drayber si Lamberto ug naalerto ang ubang drayber diha sa ilang mga radyo.
Ang maong taksi nasigpatan diha sa Mandaue ug nahitabo ang ginukdanay tali sa mga taxi driver ug sa mga tulisan hangtud nga sila naabtan diha sa sitio Marfa, sa barangay Bakilid, dakbayan sa Mandaue. Ang duha nga nadakpan nakuhaan og kutsilyo ug positibong gitumbok sa uban pang mga drayber sa taksi nga nabiktima sa nanglabay’ng mga adlaw.
Gisusi na usab kung ang duha mao ang responsable sa mga nagsunod nga upat ka pagpanulis nga nahitabo diha sa Horseshoe Drive sa Banawa, Guadalupe. (BANAT NEWS)