Tension miulbo sa pagpangguba sa balay

CEBU, Philippines - Miulbo kagahapon sa buntag ang tensiyon atol sa gipahigayong pagpangguba unta sa mga balay sa Lot 1, 49 ug 59 sa barangay Lawaan II, dakbayan sa Talisay.

Ang maong lugar gitarokan sa kapin 20 ka balay sa mga pamilyang giila nga mga apo sa mga tag-iyang Borromeo ug Yunting.

Si Reynaldo Yunting, hingkod, ug Manuel Borromeo Yunting, 60-anyos kinsa nangangkong mga apo sa mga tag-iya sa nahisgutang lote mipasangil kang Peter Lim Sesbreño ug sa ig-agaw niining si SFO1 Ramiro Sesbreño nga nanion kanila og pistola ug shot gun.

Si Peter, maoy regional manager sa Millgos Security Agency nga nagbase sa Manila ug may sangang buhatan sa dakbayan sa Sugbo ug Toledo, samtang si SFO1 Ramiro nadestino usab sa Bureau of Fire sa dakbayan sa Talisay.

Ang duha mihimakak sa mga pasangil batok kanila ug nagkanayon nga si manlalaban Raul Sesbreño kinsa nangangkong usa sa mga tag-iya sa sa lote nga may gilapdong 1.8 ektaryas, maoy amahan usab ni Peter, nakadawat og hulga sa kinabuhi hinungdan nga ila kining gikuyogan.

Matud ni Ramiro nga on leave siya gikan sa iyang trabaho sukad niadtong Marso 2, 2011 hangtud Marso 11, 2011.

Kagahapon ang habig sa mga Sesbreño, nag-hire og tulo ka mga blue guard nga gipabantay sa lugar.

Ang nahisgutang mga gwardiya kinsa mikabad og panagan dihang miabot ang mga polis mao sila si Orlando Booc Fernandez, Ay-ay Gawilan Cabontan ug Donato Bayanban.

Ang tulo pulos armado og .38 kalibreng revolver nga kargado usab og mga bala.

Si Ernesto Millanes, general manager sa Millgos Security Agency mibutyag nga expire na ang lisensiya sa tulo ka mga gwardiya apan giproseso na ang renewal niini.

Si manlalaban Raul ug si Peter, pulos usab armado og kalibre .45 nga pistola nga may pito ka buhing bala sa magazine niini, ug usa ka 12 gauge nga shot gun nga may upat ka mga buhing bala ug laing kalibre .45 nga pistola nga nagtangag og 10 ka mga buhing bala sa magazine niini.

Si PO3 Mikie Espina mibutyag nga ang tulo ka mga kalibre .38 nga revolver gipanag-iya sa Millgos ug kompleto sa dokumento lakip na ang mga armas sa amahan ug anak nga Sesbreño.

Si manlalaban Sesbreño mipasabot nga nahimo siyang co-owner sa maong lote tungod kay siya maoy abogado kaniadto sa tulo sa siyam ka mga iredero nga sila si Jose Cuenco Borromeo, Jose Horazaga Borromeo ug Miranda Talam ug ang ilang gikasabutan nga hatagan siya og share sa lote isip attorney’s fee. Apan ang mga residente sa lugar kinsa nangangkong mga apo sa mga iredero nagkanayon nga walay gipakita ngadto kanila si Sesbreño nga court order o writ of eviction nga papahawaon sila sa lunang ilang gipuy-an.  - BANAT NEWS