Joavan mipiyansa na'g P100 mil

CEBU, Philippines - Ang kontrobersyal nga si Joavan Fernandez, anak ni Mayor Socrates Fernandez sa dakbayan sa Talisay, nag-inusarang mi-adto sa buhatan sa Regional Trial Court Branch 18 aron sa paglikay nga kalutsan og warrant of arrest kagahapon.

Sa report sa ABS-CBN Central Visayas, nasayran nga si Joavan miduaw sa buhatan ni RTC-Branch 18 Judge Gilbert Moises aron pagbayad sa piyansa sa kasong Robbery nga gisang-at ni Raymund Paran batok kaniya.

Ang piyansa pinaagi sa Surity Bond nagkantidad og P100 mil apan giingong nakalimtan ni Joavan ang pagpirma sa iyang mga dokumento nga release order, gumikan sa pagdali-dali nga dili hiabtan sa taga media.

Samtang gikompirmar usab ni Moises nga adunay ipalusot nga warrant batok kang Joavan hinungdan nga mahimo pa kining ipadakop hangtod karong adlawa kun ugaling dili siya dayon makapirma sa iyang release order.

Sa diha nga nahinabi si Joavan sa Balitang Bisdak, mibutyag kini nga mao ra og naibtan siya og tunok karong gihunong na ni Paran ang kiha niini batok kaniya.

Kahinumdoman nga si Paran miatras sa maong kaso human siya moingong gihulga siyang patyon ni Joavan ug gibayran pa siya og P4 mil niini.  - BANAT NEWS