Dumpit peligro, busa ibalhin

CEBU, Philippines - Ang abogado sa kontrobersiyal nga si SPO1 Adonis Dumpit gustong   mabalhin na usab ang iyang kliyente sa laing bilanggoan gikan sa City Jail sa barangay Kalunasan ning siyudad sa Sugbo diin siya ibalhug karon.

Suma pa ni manlalaban Pedro Lesly Salva, abogado ni Dumpit   nga moduso siya og motion for transfer ngadto sa sala ni RTC-7 Branch 6 Judge Ester Veloso nga si Dumpit ibalhin gikan sa City Jail ngadto sa laing bilanggoan.

Kini tungod kay nag-ungaw sa kamatayon ang kinabuhi ni Dumpit sa maong bilanggoan kay daghang mga piniriso sa maong bilanggoan nga may pagdumot sa kanhi polis kay mao kini mipapriso kanila.

Matud pa ni Salva nga nakita niya nga may dakong kahigayonan nga manimawos ang maong mga piniriso kang Dumpit busa delikado ang kinabuhi   sa naulahi kun magpabilin kini sa City jail.

Hinuon wala pa itumbok si Salva kun asang bilanggoana niya ipabalhin   si Dumpit.

Nasayran nga gibalhin si Dumpit sa City Jail human hisakpi ni Janeth Badana, ang inahan ni Ronron Go, ang giingong gipusil patay ni Dumpit nga may special treatment ang suspetsadong polis sa detention cell sa CIDG-7.

Kini sa dihang nakita ni Badana si Dumpit nga makasuroysuroy ra ug sulod-gawas ra sa iyang selda.  - BANAT NEWS