Gwen mihinabang sa biyuda sa Bantay Dagat

CEBU, Philippines - Nakadawat og hinabang pinansyal gikan ni Gobernador Gwendolyn Garcia si Maristel Galeos, ang asawa ni Alvin Galeos, miyembro sa Bantay Dagat Task Force nga gipusil patay sa mga illegal fisher didto sa lungsod sa Argao sa miaging semana.

Tungod sa ka-busy ug kadaghan sa gimbuhaton sa gobernador, si Provincial Administrator Eduardo Habin maoy mitunol sa P10 mil nga tseke ngadto ni Galeos sa miaging hapon.

Ang biyudang Galeos mapasalamaton kaayo kang gobernador human nadawat niya ang hinabang financial.

Gihulagway ni Galeos nga ang maong kantidad dako na kaayo og ikatabang sa iyang pamilya. Ang 42 anyos nga biyuda nanginabuhi isip barangay clerk sa Argao diin ang duha niini ka anak nga babaye padayong nag-eskwela.

Kahinumdoman nga ang iyang bana nga si Alvin Galeos, 39, sakop sa Bantay Dagat sa lungsod sa Argao ug ig-agaw ni Mayor Edsel Galeos sa maong lungsod, gipusil patay niadtong Pebrero 18 niining tuiga sa usa ka illegal fisher , kinsa nasuko nga gidakop sa biktima gumikan sa paggamit og illegal nga matang sa pangisda.

Sa paglubong sa patay’ng lawas ni Galeos sa miaging semana, giubanan kini sa mga kaubang miyembro sa Bantay Dagat sa lungsod sa Argao.  - BANAT NEWS