Digital TV ipanaod sa Brgy Hall

CEBU, Philippines - Gipanghingusgan ni Konsehal Roberto Cabarrubias nga makabaton puhon og mga digital TV ang matag barangay hall aron direkta nga masayod ang mga opisyales sa barangay kung may mga balita ug mga pahibalo ang City Hall.

Nagkanayon si Cabarrubias nga malampuson ang gitambongan niya nga seminar sa Singapore ug nakita niya nga dako og matabang sa usa ka dapit ang digital TV.

“Mao na ang atong lihokon karon, pananglitan, adunay announcement si Mayor Michael Rama alang sa mga barangay official, igo na lang sila nga motan-aw sa screen ug dali ra nila madawat ang impormasyon,” nagkanayon ang konsehal.

Si Cabarrubias kinsa maoy vice chairman sa Committee on Information Technology sa konseho mipahibalo nga palapdan nila ang serbisyo sa kagamhanan sa siyudad sa Sugbo pinaagi sa paggamit sa mga modernong teknolohiya.

Sa maong pamaagi, masayran usab sa mga tawo nga naglihok ang gobyerno, matud pa niya.

Dugang pa sa konsehal nga mahinungdanon kaayo ang maong ideya gumikan sa kadako sa ginsakopan sa Cebu City nga miabot ngadto sa 80 ka mga barangay.

Masayran usab niini ang tanang proyekto nga kasamtangang gipatrabaho ug kadtong mga umaabot pang mga programa sa dakbayan.  - BANAT NEWS